Maraming mga Pilipino ang mahilig sa makeup dahil na rin sa impluwensya ng iba’t ibang personalidad sa social media. Maraming Pilipino rin ang nahihirapang bumili ng ligtas, may maayos na kalidad at murang makeup. Marami rin sa kanila ang gustong gumamit ngunit hindi pasok sa badyet, hindi alam kung ano ang dapat bilhin at hindi alam kung paano gamitin. Hindi ako eksperto pagdating sa mga makeup ngunit ako’y may karanasan sa paggamit nito. Ang mga produkto na mababanggit ay sinubukin at nasubok ko na sa tagal ng panahon na paggamit ng makeup. Narito ang mga produkto na aking marerekomenda na sulit at pasok sa badyet na kailangan ng mga nagsisimula sa makeup:

1.Garnier Micellar Water

Bago gumamit ng makeup siguraduhing malinis ang mukha. Ang micellar water ng Garnier sa halagang 85 pesos ay may magandang kalidad na maalis lahat ng dumi sa iyong mukha. Ang Garnier Micellar Water ay alcohol-free kaya ligtas sa kahit anong uri ng balat. Ang isang sangkap ng micellar water ay ang micelles at ang micelles ay malapit sa langis at dumi kaya nakakakuha sila ng impurities na hindi pinapatuyo ang balat. Itong produkto na ito ay pwedeng gamitin bilang panghugas ng mukha, pag-alis ng makeup at pang moisturize ng kutis.

2. Celeteque Hydration Facial Moisturizer

Sa halagang 150 pesos, ang Celeteque Moisturizer ay makakatulong lalong lalo na sa mga may tuyong kutis. Ito ay water-based, oil-free at hypo-allergenic na ligtas sa lahat ng uri ng kutis. Kailangan nating gumatin ng moisturizer para mapanatiling malusog ang kutis at mabawasan at  maiwasan ang mga tigyawat. Dapat itong ginagamit araw- araw at kadalasan itong ginagamit pagkatapos malinisan ang mukha at bago maglagay ng foundation o BB cream.

3. Fit Me Foundation

Ang murang foundation na aking marerekomenda ay ang Maybelline Fit Me Foundation sa halagang 399 pesos. Mayroon itong kulay na pagpipilian ng mga gumagamit lalo na sa mga kulay ng mga Asyano na tunay ngang bumabagay sa kulay ng kanilang kutis hindi katulad ng ibang foundation na pang mapuputi lamang. Hindi rin ito mabigat sa mukha at natatakpan agad nito ang mga depekto o blemishes. Ito rin ay may heavy-coverage na makaktulong para maging matipid sa paggamit nito.

4. Careline Best Brow Liner

Isa sa mga uso ngayon ay ang pagkakaroon ng maayos na kilay. Ang Careline Best Brow Liner ay 150 pesos lamang at ito agad ay nagbibigay ng magandang kalidad sa mga gumagamit. Ito ay hindi agad-agad natantangal at madali lamang gamitin. Ito rin ay may kulay na pagpipilian sa kung ano ang mas babagay sa kulay ng kutis at gusto ng mga mamimili.

5. Maybelline Fit Me Concealer

Sa halagang 250 pesos, ang Maybelline Fit Me Concealer ay magbibigay ng kalidad na katulad ng mga mahal na makeup. Ito ay may full coverage na sigurong matatakpan ang mga blemishes tulad ng eyebags, tigyawat, pagpula ng mukha, at iba pa. Ito ay may natural finish kung saan hindi halatang may nilagay ka sa mukha. Ito rin ay blendable na dapat nating hinahanap sa mga concealer na nagbibigay ng malaking tulong sa mga baguhan sa makeup. Ang Fit Me Concealer ay sulit lalong lalo na sa mga may gustong itago sa mukha. Tulad ng Fit Me Foundation, ito ay may iba’t ibang pagpipilian ng kulay na bumabagay sa kutis ng mga Asyano partikular ang mga Pilipino.

6. Vice Cosmetics Blush

Isa rin sa mga hilig ng mga Pilipino ay ang paglagay ng blush-on. Sa halangang 145 pesos, ang Vice Cosmetics ay nagbibigay ng creamy  na blush-on kung saan nagiging dahilan ng pagiging madali nitong i-blend. Ito ay may kalidad na nilalampasan ang mga blushes na mahal. Ito rin ay may maraming pagpilian na kulay depende sa kung ano ang gusto ng mga mamimili. Ang pagpipilian ng kulay ay magagamit sa iba’t ibang okasyon.

7. Wet n Wild Pressed Powder

Para hindi kaagad matunaw at maalis ang mga produkto na iyong nilagay sa iyong mukha, kailangan gumamit ng pressed powder para masiguradong hindi masisira ang mga produkto sa iyong mukha. Sa halagang 299 pesos, ang Wet n’ Wild Pressed Powder ang nagbibigay ng magandang epekto para hindi matunaw ang makeup sa mukha na dulat ng oil o langis na inilalabas ng ating mukha.

8. Nichido Final Powder

Sa panahon natin ngayon, mahilig tayong mag-selfie o mag-picture. Para sa maging makinis at magandang mukha sa picture, ang Nichido Final Powder sa halagang 150 pesos ay nakakatulong para mabawasan ang mga linya at butas sa mukha. Tinutulungan din nitong hindi maging oily ang mukha ng gumagamit. Ang Nichido Final Powder ay mura ngunit may magandang kalidad at may iba’t ibang kulay na naaayon sa kutis ng mga bumibili lalong lalo na sa mga Pilipino.

9. Maybelline Hypercurl Volum’ Express Mascara

Ang 199 pesos mo ay hindi masasayang sa paggamit ng Maybelline Hypercurl Volum’ Express Mascara dahil ito ay may kalidad kung saan napapakapal at napapahaba nito ang ating pilik mata kahit kaunti lamang ang ilagay na dahilan ng pagiging sulit. Ito ay water-proof kaya kahit umiyak o mag hilamos ay hindi madaling matanggal. Madali rin itong ilagay dahil sa kanyang applicator na pwedeng pwede sa mga baguhan.

10. Vice Cosmetics Lip Tint

Sa halagang 145 pesos, ang Vice Cosmetics Lip Tint ang sulit para sa kahit sino. Hindi nito tinutuyo ang balat ng ating bibig at mayroong madaming kulay na pagpipilian depende sa okasyon at kagustuhan ng mga mamimili. Ito rin ay magiging bilang cheek tint o blush na isa sa mga dahilan kung bakit ito sulit. Ang mga kulay na pagpipilian ay sinigurado ng gumawa na bagay sa kahit sino. Hindi rin ito madaling maalis at madali lamang ilagay sa bibig. At ang laging hinahanap sa mga makeup, ito ay blendable.

Maraming estudyante and aktibo sa mga iba’t ibang aktibidad na ibinibigay ng paaralan ngunit kadalasan napapabayaan nila ang kanilang pag-aaral dahil sa mga aktibidad na ito. Nagsimula akong sumali sa mga patimpalak simula noong ako’y bata pa. Sa una, ito’y madali ngunit habang tumatagal ay pahirap na nang pahirap dahil na rin sa parami nang parami ang kailangan gawin sa eskwelahan. Isa akong miyembro ng dance troupe kung saan kinakailangan para sa pag-ensayo. Sumasali rin ako sa mga paligsan sa loob at labas ng eskwelahan na kadalasang dahilan ng pagkawala ko sa klase. Dahil sa mga ito, marami akong hindi nagagawang gawain at hindi naiintindihan na lesson. Sa kabila ng mga ito, ay nakakakuha pa rin ako ng mga matataas na marka at mga gantimpala. Marami ang ang nagtatanong kung paano ko napagsasabay ang extra-curricular activities at ang pag-aaral na may kasamang medalya at awards. Narito ang mga tips kung paano ko nagawa ito: ​

1. Time Management o Pamamahala ng Oras

– Hangga’t maaari ay wag magsasayang ng oras. Gumawa ng schedule o listahan ng mga gagawin para makita at malaman kung ano-ano ang mga gagawin sa bawat oras. Halimbawa:

* 8:00 am – 5:00 pm ay ang oras para pumasok sa eskwelahan at mag-aral

* 5:00 pm- 6:00 pm ay ang oras para sa pag ensayo

* 6:00 pm- 8:00 pm ay oras para sa aking sarili

* 8:00 pm – 10:00 ay oras para magreview at gawin ang mga takdang aralin

* Pagpatak ng 10:00 pm ay dapat ako’y nagsisimulang matulog

– Makakatulong ito para hindi tayo nagmamadali sa mga dapat nating gawin at hindi ipinapasabukas na karaniwang dahilan ng pagkakatambak ng mga gawain.

2. Know What to Prioritize o Alam Dapat ang Uunahin

– Kung papipiliin ka sa dalawa kung ano ang dapat mong unahin, siguraduhin mong ang pipiliin mo ay kung ano ang mas importante. Importante ang extracurricular activities, ngunit dapat nating unahin ang mas importante at ito ay ang pag-aaral. Ang ating responsibilidad ay dapat matuto nang matuto sa klase bilang mga estudyante. Isang tip ay dapat mauna nating tapusin ang mga gawain na malapit na ang deadline o araw ng pag pasa. Matuto tayong mag-sakripisyo ng isang bagay para sa kung ano ang mas importante. Halimbawa, mayroon kayong gawain na kailangang gawin bukas sa inyong klase at kailangan ang iyong presensya dahil nakasalalay ang grado mo sa gawaing ito ngunit kasabay nito ang pag-eensayo niyo para sa iyong nalalapit na contest sa isang buwan. Sa sitwasyon na ito, dapat lang na ang piliin natin ay ang pagtapos ng gawain sa klase ngunit dapat nating siguraduhin na makakapag-ensayo ka pagkatapos sa gawaing ito. Mayroon at mayroon tayong dapat unahin ngunit wag pabayaan ang ibang responsibilidad na sumusunod dito gaya ng extracurricular activities.

3. Be Picky about Extracurricular Activities o Maging Mapili sa mga Extracurricular Activities

-Wag sumali sa lahat ng grupo o paligsahan sa eskwelahan dahil nakakapanghina ito ng katawan at may malaking tsansa na hindi ka magiging interasado sa karamihan nito. Maging matalino sa pagpili sa kung saan ka pinaka interesado at ito ay isa sa tutulong sayo patungo sa tagumpay. Kapag pumili ka ng marami, mawawala ang pokus mo sa bawat gawain na kailangan gawin sa mga grupo at paligsahan na ito at mahihirapan kang hatiin ang iyong oras para tapusin ang mga dapat tapusin.

4. Catch Up on your Schoolwork o Humabol sa mga Gawain sa Klase

-Kung ikaw ay nahuhuli na dahil sa maraming gawain sa iba’t ibang aktibidad, ugaliing lumapit sa mga guro para humabol sa mga gawain na iyong nalampasan dahil sa iyong pagkawala. Maghanap ng oras para makahabol at magpaturo o magpatulong sa iyong mga kaklase kung paano ito gagawin at kung ano-ano ang kanilang napag-aralan habang wala ka. Wag sanayin ang sarili na umasang lalapit sa iyo ang mga tao para tulungan at ipapaalala sa iyo ang mga hindi mo nagawa. Responsibilidad mo bilang estudyante na gawin ang mga ito nang hindi umaasa sa iba. Wag aabusuhin ang oras at tulong ng mga tao sa iyong paligid.

5. Do Not Give Up o Wag Susuko

-Maraming beses tayong mapapagod sa pagsasabay-sabay ng mga gawaing dapat tapusin na karaniwang dahalin ng mga estudyante para sumuko. Kung nasa punto tayo na ganito, dapat nating isipin kung bakit natin ito ginagawa. Laging tandaan na may naghihintay na premyo sa bawat gawain na natatapos natin. Humanap ng inspirasyon para hindi sumuko at wag hahayaang masayang lahat ng pinagpaguran natin. Isipin nating isa lamang itong mga pagsubok patungo sa tagumpay na kailangan nating lampasan. Kapag sumuko ka, talo ka.

6. Rest o Magpahinga

-Sa sobrang daming ginagawa sa loob at labas ng silid-aralan, nararapat lamang na dapat tayo’y magpahinga. Kumain at matulog sa tamang oras sapagkat ito ang magbibigay ng lakas sa ating katawan para matapos ang mga gawain. Ang pagpapahinga ay matutulungan ka para makapag-isip ng mabuti.

7. Maglaan ng Oras para sa Sarili, Kaibigan at Pamilya

-Isa sa epektibong ensayo para sa tagumpay ay ang oras sa mga insipirasyon natin sa buhay. Wag kalimutang magsaya kasama ang iyong mga kaibigan at pamilya. Wag masyadong magpalamon sa iba’t ibang gawain sa paaralan. Dapat din nating wag kalimutang bigyan natin ng oras ang ating sarili. Gawin natin kung ano ang ating mga gusto. Halimbawa na lamang ay ang pagbabasa ng libro na iyong gusto na walang kaugnayan sa pag-aaral. Sa paraang ito, lagi nating nasa isip kung para kanino ang ating ginagawa.

8. Enjoy!

-Ang huli ay dapat magsaya. Kung masaya ka sa ginagawa mo, maganda ang kalalabasan nito. Para maging masaya, dapat mahalin natin ang ating mga ginawa kahit na pinapahirapan tayo nito. Magpulot ng aral sa bawat sugat na makukuha habang ginagawa ang mga gawain sa eskwelahan at mga aktibidad na sinalihan. Mahalagang maging masaya sa proseso patungong tagumpay.

Thanks for joining me!

Good company in a journey makes the way seem shorter. — Izaak Walton